خلفاء کے طرز زندگی میں تبدیلی

دوسری نمایاں تبدیلی یہ تھی کہ دور ملوکیت کے آغاز ہی سے بادشاہ قسم کے خلفاء نے قیصر وکسرٰی کا سا طرز زندگی اختیار کرلیا اور اس طریقے کو چھوڑ دیا جس پر نبی ﷺ اور چاروں خلفاء راشدین زندگی بسر کرتے تھے ۔ انھوں نے شاہی محلات میں رہنا شروع کردیا ۔ شاہی حرس ( bodyguard ) ان کے محلوں کی حفاظت کرنے اور ان کے جلو میں چلنے لگے ۔ حاجب و دربان ان کے اور عوام کے درمیان حائل ہوگئے ۔ رعیت کا براہ ِ راست ان تک پہنچنا اور ان کا خود رعیت  کے درمیان رہنا سہنا اور چلنا پھرنا بند ہوگیا ۔ اپنی رعیت کے حالات معلوم کرنے کے لیے  وہ اپنے صورت کار پردازوں کے محتاج ہوگئے جن کے ذریعے سے کبھی کسی حکومت کو بھی صحیح صورت احوال کا علم نہیں ہو سکا ہے ۔ اور رعیت کے لیے بھی یہ ممکن نہ رہا کہ کہ بلاتوسط ان تک اپنی حاجات اور شکایات لےکر جاسکیں ۔ یہ طرز حکومت اس طرز کے بالکل برعکس تھا جس پر خلفائے راشدین حکومت کرتے تھے ۔ وہ ہمیشہ عوام کے درمیان رہے جہاں ہر شخص ان  سے آزادی کے ساتھ مل سکتا تھا۔ وہ بازاروں میں چلتے پھرتے تھے اور ہرشخص ان کا دامن پکڑ سکتا تھا ۔ وہ پانچوں وقت عوام کے ساتھ انھی کی صفوں میں نمازیں پڑھتے  تھے اور جمعہ کے خطبوں میں ذکرا للہ اور تعلیم دین کے ساتھ ساتھ اپنی حکومت کی پالیسی سے بھی عوام کو آگاہ کرتے تھے اور اپنی ذات اور اپنی حکومت کے خلاف عوام کے ہر اعتراض کی جواب دہی بھی کرتے تھے ۔ اس طریقے کو حضرت علی رضی اللہ عنہ نےکوفے میں اپنی جان کا خطرہ مول لے کر بھی آخر وقت تک نباہا ۔ لیکن ملوکیت کا دور شروع ہوتے ہی اس نمونے کو چھوڑ کر دوم وایران کے بادشاہوں کا نمونہ اختیار کرلیا گیا ۔ اس تبدیلی کی ابتداء حضرت معاویہ رضی اللہ عنہ کے زمانے میں ہوچکی تھی ۔ بعد میں یہ برابر بڑھتی چلی گئی ۔